فيروس كورونا والقلب

 

⛔ هذا الفيروس اللعين قد يصيب القلب 🫀 بأكثر من شكل .. هتكلم عنهم باختصار لأن ماعدش فيه بيت لم يدخله هذا الفيروس .. ومهم إننا نكون فاهمين أبعاد هذا المرض .. 

1️⃣ لما الاصابة بتحصل .. العدوى والالتهاب والحمى بيخلوا الدم أكثر عرضة للتجلط .. كذلك نقص الأكسجين اللى بيحصل مع الاصابة بيقلل امداد عضلة القلب بالأكسجين .. ودا بيسبب اللى بنسميه النوع الثانى من احتشاء عضلة القلب(جلطة القلب).

دا ممكن يحصل فى مصابين ماكانش عندهم أى مشاكل سابقة فى القلب .. ومفيش عندهم تصلب أو تكلس فى شرايين القلب. 

2️⃣ جلطة الأوردة الطرفية 🦵وجلطة الشريان الرئوى🫁 أمر متكرر. 

3️⃣ برضه ممكن يسبب إلتهاب فى عضلة القلب 🫀.. ودا بيأثر على وظائف القلب حتى بعد مرور المرحلة الحرجة من الاصابة بالفيروس ويسبب أعراض ضعف عضلة القلب من نهجان وصعوبة بالتنفس وألم بالصدر.  

4️⃣ ممكن كمان يعمل إلتهاب فى الغشاء التامورى المحيط بعضلة القلب ويسبب ألم فى الصدر مع النفس. 

5️⃣ وممكن يعمل تسارع غير منتظم فى ضربات القلب وقد يصل لتسارع خبيث فى الضربات.

طيب نعمل إيه ؟🧐

أولاً .. نتطعم 💉 .. وعارف إن حضرتك تعرف فلان اللى أخد التطعيم وجاله برضه .. 

صدقنى التطعيم هدفه الأساسى إنه يقلل الأعراض لما حضرتك تتصاب .. ويقلل احتمالية دخولك المستشفى .. ويقلل احتمالية حاجتك للرعاية المركزة لو احتجت تتحجز فى مستشفى  .. 

وماحدش أبدا أبدا قال أو هيقول لحضرتك إنه "هيحميك بنسبة ١٠٠%" 

ثانيا .. نلتزم 😷 .. غسل الأيدى ولبس الكمامة والتباعد الاجتماعى قدر الامكان .. هيقلل احتمالية اصابتك وبالتالى هيقلل احتمالية حدوث كل المشاكل دى. 

ثالثا .. فى حالة الإصابة لا قدر الله .. المتابعة مع طبيب 🩺 مختص يفحص حضرتك ويكتب الدواء اللازم لحالتك .. 

مفيش حاجة اسمها بروتوكول .. الدوا اللى يمشى معاك ممكن يسبب ضرر خطير لغيرك .. 

وربنا يعافينا جميعاً ويزيح هذه الغمّة .. 

د. أحمد حجازى عبد السميع

أخصائى أمراض القلب والقسطرة القلبية 

للحجز والاستفسار : 

☎️ 𝟬𝟭𝟬 𝟮𝟲𝟮 𝟮𝟲𝟭 𝟬𝟱 

📍 المنصورة - شارع أحمد ماهر الرئيسى - بجوار بنك 𝗖𝗜𝗕